Праграма Эразмус Мундус набывае папулярнасць сярод выкладчыкаў
З пачаткам новага семестра большасць студэнтаў трэцяга курса юрыдычнага факультэта пачалі слухаць лекцыі па дысцыпліне “Крымінальны працэс”. І толькі трэцяму патоку правазнаўцаў не пашчасціла (а, мабыць, і наадварот).Справа ў тым, што з 25 жніўня па 25 верасня 2010 г. дацэнт кафедры крымінальнага працэсу і пракурорскага нагляду юрыдычнага факультэта Белдзяржуніверсітэта
В.І. Самарын быў камандзіраваны для ўдзелу ў праграме Еўрапейскага Саюза па абмене для выкладчыкаў «Эразмус Мундус. Акно знешняга супрацоўніцтва» (Erasmus Mundus, «External Cooperation Window»)
ва ўніверсітэт Дэуста (г. Більбао, Гішпанія).
Стажыроўка пачалася з сумеснага з намеснікам дэкана па міжнародных сувязях факультэта права універсітэта Дэуста Марыяй Пілар Канэда Аррыйага вызначэння праграмы стажыроўкі.
Улічваючы, што першы тыдзень знаходжання ў Більбао супаў са святкаваннем дзён горада (“Fiestas de bilbao”), калі горад амаль не працуе, а толькі гуляе, перад пачаткам непасрэднай працы мелася магчымасць крыху пазнаёміцца з культурай Гішпаніі. Напрыклад, была наведана карыда. Падчас яе за адзін вечар бессэнсоўна было забіта 6 быкоў.
Прыемна было чуць у калідорах гішпанскага ўніверсітэта словы “Добры дзень, Вадзім Ігаравіч!” ад студэнтаў нашага факультэта, якія навучаюцца ў Дэуста. Сёлета наш дэсант занадта прадстаўнічы.Непасрэдная праца адбывалася ў рамках інтэнсіўнай праграмы “Асноўныя праблемы транснацыянальнага права і яго вынікі для кампаній і міжнароднага гандлю” (“General Problems of Transnational Law and its Implications for the Companies in International Trade”).
У рамках дадзенай праграмы праца складалася наступным чынам. Раніцамі студэнты з розных краін (Беларусь, Вялікая Брытанія, Гішпанія, Італія, Калумбія, Кітай, Польшча, Турцыя, Францыі, Украіна, Эстонія і інш.) слухалі ўсе разам лекцыі па транснацыянальным праве.
У другой палове дня студэнты падзяляліся на групы і на працягу 5 дзён вырашалі адну справу ў галіне міжнародных дагавораў куплі-продажы.
У апошні дзень групы студэнтаў спаборнічалі паміж сабой у прэзентацыі справы перад судом (moot court). Спачатку суддзямі былі выкладчыкі, а ў фінале – сапраўдныя суддзі з Апеляцыйнага суда г. Більбао.
Функцыя беларускага выкладчыка была кіраваць працай студэнцкіх груп падчас падрыхтоўкі да суда.Акрамя таго 6 верасня была прачытана лекцыя на ангельскай мове аб асноўных рысах беларускай прававой сістэмы (што адзначана ў дыпломе кожнага студэнта, які ўдзельнічаў у праграме),
а 8 верасня – выступіў у якасці судзі ў moot court
У далейшым адміністрацыяй юрыдычнага факультэта была забяспечана магчымасць працаваць у асобным пакоі для даследчыкаў у бібліятэцы факультэта.
Можна было наведваць асобныя лекцыі выкладчыкаў факультэта. Разам з замежнымі студэнтамі (у тым ліку, з юрыдычнага факультэта БДУ) былі на прыёме ў мэрыі г. Більбао.
Падчас знаходжання былі праведзены шэраг размоў аб навуковым і метадычным супрацоўніцтве з намеснікам дэкана па міжнародных сувязях факультэта права універсітэта Дэуста Марыяй Пілар Канэда Аррыйага, супрацоўнікамі кафедраў крымінальна-прававога цыклу, прафесарам Верай Бірмінгем з універсітэта Кінгстан (Вялікая Брытанія), дэканам факультэта права Стамбульскага ўніверсітэта прафесарам Халюкам Кабааліоглу.
Удзел у праграме дазволіў на практыцы выкарыстаць методыку выкладання, якая кардынальна адрозніваецца ад той, якая мае месца ў Беларускім дзяржаўным ўніверсітэце, прааналізаваць яе станоўчыя і адмоўныя бакі.
Вольны час В.І. Самарын прысвяціў знаёмству з культурай Краіны Баскаў (гарады Сан-Себасцьян (Даносція), Віторыя (Гайстэц)), наведванню Мадрыда і Барселоны.
дацэнт кафедры крымінальнага працэсу і пракурорскага нагляду В.І. Самарын.
Фота В.І. Самарын.