Міхаілу Кандрацьевічу Казлову – 75 год! Віншуем!
20 снежня 2011 года спаўняецца 75 год аднаму з самых харызматычных і неардынарных супрацоўнікаў кафедры тэорыі і гісторыі дзяржавы і права юрыдычнага факультэта >Казлову Міхаілу Кандрацьевічу.Міхаіл Кандрацьевіч, цэлая эпоха ў жыцці факультэта, нарадзіўся ў в. Смолькі Касцюковіцкага раёна Магілёўскай вобласці ў звычайнай сялянскай сям’і, ведаў і голад, і нямецкую акупацыю, і пасляваенныя цяжкасці. Першапачаткова лёс не вельмі адрозніваўся ад лёсу яго аднагодак: адначасовае сумяшчэнне школы з нялёгкай працай ў родным калгасе.
Але вось тут лёс дае пэўны зігзаг, а мо гэта не выпадак, а вынік пэўных рыс характару, такіх як упартасць, розум, традыцыйнае беларускае імкненне да лепшай долі. Міхаіл Кандрацьевіч амаль што пасля заканчэння школы як лепшы вучань і чалавек з пэўным жыццёвым вопытам (не будзем забываць, што у школьнае навучанне нашага юбіляра ўмяшалася вайна) пачынае працаваць настаўнікам гісторыі і геаграфіі суседняй вёскі. Мы ўпэўнены, што, калі б не прага да справядлівасці і не імкненне атрымаць юрыдычную адукацыю, то з вялікай доляй верагоднасці мы маглі б ведаць Міхаіла Кандрацьевіча на пасадзе Міністра адукацыі Беларусі.
І вось з 1963 па 1967 год Міхаіл Кандрацьевіч – студэнт юрыдычнага факультэта Беларускага дзяржаўнага ўніверсітэта. Разумны і працавіты, ініцыятыўны і мудры не па гадах, ён карыстаецца павагай сярод кіраўніцтва, выкладчыкаў, студэнтаў. З 1968 па 1970 год працуе ў пракуратуры спачатку памочнікам пракурора, а потым следчым Уздзенскага раёна.
Але прага да навукі і былы педагагічны вопыт, як магутная рака, вялі нашага імянінніка да юрыдычнага факультэта. Пасля кароткатэрміновай працы ў Міністэрстве сацыяльнай абароны БССР ў 1973 годзе ён паступіў на дзённую форму навучання ў аспірантуру кафедры тэорыі і гісторыі дзяржавы і права, дзе пад кіраўніцтвам выбітнага вучонага, загадчыка кафедры тэорыі і гісторыі дзяржавы і права, доктара юрыдычных навук, прафесара С. Р. Драбязкі ў 1974 годзе абараніў кандыдацкую дысертацыю на тэму “Ахова здароўя – функцыя сацыялістычнай дзяржавы”.
З 1973 года Міхаіл Кандрацьевіч – супрацоўнік Беларускага дзяржаўнага ўніверсітэта, спачатку выкладчык, старшы выкладчык кафедры тэорыі і гісторыі дзяржавы і права. Адначасова наш юбіляр вядзе актыўнае грамадскае жыццё, выбіраецца сакратаром партыйнага бюро юрыдычнага факультэта, намеснікам сакратара партыйнага камітэта БДУ, дэпутатам Савета народных дэпутатаў Кастрычніцкага раёна г. Мінска.Але найбольш яскрава якасці Міхаіла Кандрацьевіча выявіліся тады, калі з 1980 па 1997 год ён займаў пасаду намесніка дэкана юрыдычнага факультэта. У той час факультэт не быў такім вялікім, завочнікі набывалі адукацыю ў спецыялізаваным агульнаўніверсітэцкім падраздзяленні, таму намеснікаў ў дэкана было толькі два. Адзін адказваў за навуку, а другі – і гэтую пасаду займаў наш калега – адказваў за вучэбную, выхаваўчую, сацыяльную, ідэалагічную работу.
17 год Міхаіл Кандрацьевіч займаўся студэнтамі, кантраляваў вучэбны працэс, дапамагаў парадамі, разбіраў канфлікты і праблемы, сачыў за парадкам у інтэрнаце, арганізоўваў будаўнічыя атрады, накіроўваў на бульбу (пры гэтым ў якасці агітацыі казаў, што ў той мясцовасці добры самагон, а на справе гэта сапраўды было так). Рабіў шмат чаго, бо студэнты, як дзеці, якім трэба дапамагчы, даць параду, прачысціць мазгі калі трэба. І не дарма падчас святкавання чарговага юбілею юрыдычнага факультэта былыя выпускнікі паставілі яго імя разам з імёнамі дэканаў:
Выйду на Московскую я,Рано утром и без коня
Где ж ты, мой юрфак, где мой факультет,
То ли было это, то ли нет
…
Балашенко нынче наш декан,
Это не мираж, не обман,
Где же наш Чигир, где же Годунов,
Где Тихиня и где же наш Козлов?
Аб Міхаіле Кандрацьевічы сярод студэнтаў хадзілі легенды аб студэнтках, якія былі платанічна закаханыя ў яго, аб парадах падчас наведвання інтэрната студэнтам-юрыстам. Заўсёды элегантны (касцюмы і гальштукі – асобная легенда), эфектны, красамоўны, прамы ў адносінах, ён карыстаецца заслужанай павагай студэнтаў, выпускнікоў і кіраўніцтва.
Заслугі Міхаіла Кандрацьевіча перад факультэтам, БДУ і краінай неаднаразова адзначаліся рознымі ўзнагародамі і заахвочваннямі. Вось і зараз навуковая і грамадская дзейнасць нашага юбіляра адзначана Падзякай Рэктара БДУ.
Шаноўны і любімы Міхаіл Кандрацьевіч, шчыра віншуем Вас з 75-годдзем, жадаем моцнага здароўя, шчасця, дабрабыту і спадзяёмся, што Вы яшчэ доўгі час будзеце працаваць разам з намі.
Калектыў кафедры тэорыі і гісторыі дзяржавы і права
Адміністрацыя сайта ад імя ўсіх супрацоўнікаў юрыдычнага факультэта далучаецца да шчырага віншавання калег з кафедры тэорыі і гісторыі дзяржавы і права, а таксама нагадвае, што ўсе, хто жадае, маюць магчымасць павіншаваць Міхаіла Кандрацьевіча ў гасцёўні сайта.