Віншуем Варвару Уладзіміраўну Сажыну з днём нараджэння!
16 жніўня святкуе свой дзень нараджэння “Ледзі Дасканаласць” кафедры тэорыі і гісторыі дзяржавы і права юрыдычнага факультэта – Варвара Уладзіміраўна Сажына.Жыццё нашай імянінніцы непарыўна звязана з навуковай і выкладчыцкай дзейнасцю. Пасля заканчэння юрыдычнага факультэта БДУ яна, як адна з найлепшых выпускніц, была накіравана для павышэння сваёй кваліфікацыі ў аспірантуру Інстытута дзяржавы і права Акадэміі навук СССР – вядучай на той час навуковай установы ў галіне юрыдычнай навукі, дзе паспяхова абараніла дысертацыю на суіскальніцтва навуковай ступені кандыдата юрыдычных навук на тэму “Административная юстиция Великобритании”. З 1984 па 1990 год Варвара Уладзіміраўна – супрацоўнік аддзела дзяржаўнага права і кіравання Інстытута філасофіі і права Акадэміі навук Беларусі, але найбольш яскрава яе талент выбітнага аратара і харызматычнага лектара, глыбокага навукоўцы і мэтанакіраванага кіраўніка навуковымі даследаваннямі студэнтаў раскрыўся пасля пераходу на пасаду дацэнта кафедры тэорыі і гісторыі дзяржавы і права юрыдычнага факультэта БДУ.
Шматлікія пакаленні выпускнікоў юрыдычнага факультэта памятаюць лекцыі нашай імянінніцы па гісторыі дзяржавы і права замежных краін; яна з абаяльнай усмешкай, але цвёрда вучыць студэнтаў розніцы паміж рэформамі Эфіальта і Перыкла, паміж сервітутам і ўзуфруктам, дае магчымасць прасачыць эвалюцыю дзяржаўнага і сацыяльнага ладу вядучых міравых дзяржаў. З аднога боку, здаецца, дзеля чаго гэтыя веды аб часта ўжо знікнуўшых краінах і нормах, калі некаторыя папракаюць родны факультэт тым, што ён быццам не дае практыкаарыентаваных ведаў? Але з іншага боку, універсітэцкая адукацыя тым і адрозніваецца ад рамесніцтва на юрыдычнай глебе, што дае магчымасць думаць і разважаваць, што выпускае людзей, якія маюць высокую агульную і прафесійную культуру. І гэтыя веды, якія давала і дае студэнтам Варвара Уладзіміраўна, памножаныя на асабістыя якасці і прыклады лектара, даюць нам магчымасць спадзявацца, што нашы выпускнікі будуць з гонарам несці высокае званне студэнтаў БДУ.
Зараз Варвара Уладзіміраўна працягвае супрацоўнічаць з кафедрай тэорыі і гісторыі дзяржавы і права ў якасці сумяшчальніка, бо сонца ўзыходзіць над усімі і факультэт не можа прыватызаваць выбітных прафесіяналаў, таму зараз асноўным месцам працы нашага імянінніка з’яўляецца кафедра канстытуцыйнага і адміністрацыйнага права Акадэміі кіравання пры Прэзідэнце Рэспублікі Беларусь. Але мы ўсе спадзяваемся на хуткае завяршэнне гэтай зацягнуўшайся камандзіроўкі.
Лепшымі характарыстыкамі для нашай імянінніцы можна прывесці два англійскіх слова “smart” і “drive”. Прычым апошняе вельмі яскрава апісвае ўдзел Варвары Уладзіміраўны ў жыцці кафедры тэорыі і гісторыі дзяржавы і права: яна ўклала душу ў станаўленне традыцыі шанавання юбіляраў кафедры – прафесараў Юхо Іосіфа Аляксандравіча і Драбязкі Сцяпана Рыгоравіча, іншыя праекты кафедры, у тым ліку і міжнародныя, не застаюцца без яе увагі і ўдзелу.Варвара Уладзіміраўна − шчаслівая жонка і маці, прызнаны прафесіянал і сумленны чалавек, і мы можам толькі шчыра парадавацца, што нам давялося працаваць (а многім і слухаць лекцыі) з такім чалавекам.
Дарагая і любімая Варвара Уладзіміраўна! Прыміце нашыя самыя шчырыя віншаванні з днем нараджэння, будзьце заўсёды дасканалай, выбітнай, каханай і шчаслівай.
Калектыў кафедры тэорыі і гісторыі дзяржавы і права
Адміністрацыя сайта ад імя ўсіх супрацоўнікаў юрыдычнага факультэта далучаецца да шчырага віншавання калег з кафедры тэорыі і гісторыі дзяржавы і права, а таксама нагадвае, што ўсе, хто жадае, маюць магчымасць павіншаваць Варвару Уладзіміраўну ў гасцёўні сайта.
Фота и апрацоўка - Л.В.Беляевой
